အူမနှင့် သီလ


အာဠာဝကဘီလူးက “အရှင်ဘုရား – ဘယ်ပုံဘယ်နည်း အသက်မွေးခြင်းဟာ အကောင်းဆုံးပါလဲ” လို့ ဘုရားကို မေးလျှောက်တော့ ဘုရားက “ပညာနဲ့အသက်မွေးတာ အကောင်းဆုံး” လို့ ဖြေတော်မူခဲ့ပါတယ်။ အဌကထာဆရာက ပညာနှင့် အသက်မွေးခြင်းဟူသည် နှစ်ဖက်မြင်ပုဂ္ဂိုလ်တို့၏ အသက်မွေးခြင်းလို့ ဖွင့်ဆိုပါတယ်။ နှစ်ဖက်ဟူသည် လက်ရှိပစ္စုပ္ပန်ဘဝနဲ့ နောင်တမလွန်ဘဝကို ဆိုလိုတာပါ။ နောက်တစ်နည်းအနေနဲ့ သူ့ဘက်၊ ကိုယ့်ဘက်၊ သူ့ဖို့၊ ကိုယ့်ဖို့ ကိုလည်း ဆိုလိုပါတယ်။ သူသူကိုယ်ကိုယ် အသက်မွေးကြ၊ ဝမ်းကျောင်းကြရမှာ ပစ္စုပ္ပန်အရေးနဲ့ တမလွန်အရေးဆိုပြီး နှစ်ဖက်မျှတွေးဖို့လိုပါတယ်။ နှစ်ဖက်မျှမြင်ရမယ်။ သူ့ဖို့ကိုယ့်ဖို့ နှစ်ဖက်မျှတွေးရပါမယ်။

လူဆိုတာ တစ်ယောက်တည်းနေတော့ တစ်ဝမ်းတစ်ခါးသာ ရှိပါတယ်။ နှစ်ယောက်ပေါင်းမိတော့ နှစ်ဝမ်းနှစ်ခါး။ ဒီလိုနဲ့ ဝမ်းတွေခါးတွေက တိုးပွားများပြားလာမယ်။ ဝမ်းတွေရှိတော့ ဝမ်းစာရှာကြရပါရော။ ဒီလို ဝမ်းစာရှာကြရာမှာ တချို့က ဝမ်းသာဝတယ်၊ ကုသိုလ်က မရ။ တချို့ကျ ကုသိုလ်သာရတယ်၊ ဝမ်းက မဝ။ ပီတိစားပြီး အားရှိနေကြရတယ်။ တချို့က ကုသိုလ်လည်းမရ၊ ဝမ်းလည်းမဝ။ တချို့များ ကျတော့ ကုသိုလ်လည်းရ၊ ဝမ်းလည်းဝကျပါတယ်။ ပညာနဲ့ အသက်မွေး ဝမ်းကျောင်းသူဟာ ကုသိုလ်လည်းရ၊ ဝမ်းလည်းဝတဲ့အမျိုးပါပဲ။

ဒီနေရာမှာ ပညာဆိုတာ အသိပညာ၊ အသိစိတ်ဓါတ်၊ အသိတရား ဖြစ်ပါတယ်။ အသိစိတ်ဓါတ်ရှိသူဟာ ကောင်းတဲ့အပြုအမူ၊ ကောင်းတဲ့ အလေ့အထရှိတယ်။ ကောင်းတဲ့အပြုအမူ၊ ကောင်းတဲ့အလေ့အထဟာ သီလသိက္ခာ ပါပဲ။ အသိစိတ်ဓါတ်ရှိသူဟာ ကောင်းတဲ့စိတ်ထား ရှိတယ်။ စိတ်ထားကောင်းတယ်ပေါ့။ ကောင်းတဲ့စိတ်ထားရှိလို့ စိတ်ထားကောင်းတာဟာ သမာဓိသိက္ခာဖြစ်ပါတယ်။ သမာဓိမျာ ‘သံ’ က ကောင်းခြင်းလို့ အဓိပ္ပါယ်ထွက်ပြီး ‘အဓိ’ က စိတ်ထားလို့ အဓိပ္ပါယ်ရပါတယ်။ ဒါကြောင့် သမာဓိဆိုတာ စိတ်ထားကောင်းခြင်းပဲ ဖြစ်ပါ တယ်။ အသိစိတ်ဓါတ်၊ အသိတရား၊ အသိပညာကိုယ်တိုင်ဟာ ပညာသိက္ခာ ဖြစ်ပါတယ်။

အဲဒီတော့ အသိစိတ်ဓါတ်၊ အသိတရားရှိသူမှာ ရိက္ခာနဲ့ သိက္ခာက တစ်သားတည်းကျနေပါတယ်။ အူမနဲ့ သီလ ထပ်တူမျှနေပါတယ်။ ဘုရားရှင်မိန့်တော်မူတဲ့ ပညာနဲ့အသက်မွေးတာ အကောင်းဆုံးဆိုတာက ဒီလို ရိက္ခာနဲ့ သိက္ခာ တစ်ထပ်တည်းကျတဲ့ အသက်မွေးခြင်း၊ အူမနဲ့သီလ ထပ်တူမျှနေတဲ့ အသက်မွေးခြင်းကို ဆိုလိုပါတယ်။ ဒီလို အသက်မွေးနိုင်သူဟာ တော်လည်းတော်၊ ကောင်းလည်းကောင်းတဲ့ အတွက် သူတော်ကောင်း မည်ပါတယ်။

အူမနဲ့သီလကို တစ်သီးတစ်ခြားခွဲထားလို့မရ၊ တစ်ဖက်ဖက် အစွန်းထွက်လို့မရ၊ မျှနေမှသာ သဘာဝကျပါတယ်။ လူတိုင်းမှာ အူမရှိပြီး အူမတိုင်းလည်း တောင့်ဖို့လိုပါတယ်။ အူမတောင့်ခြင်းဟာ သီလစောင့်ခြင်းကို ကျေးဇူးပြုနိုင်သလို သီလစောင့်ခြင်းကလည်း အူမတောင့်ဖို့အတွက် ကျေးဇူးပြုနိုင်ပါလိမ့်မယ်။ သီလဆိုတာ ကောင်းသောအလေ့အထ၊ ကောင်းသောအပြုအမူဖြစ်တဲ့အတွက် ကောင်းသောအလေ့အထတွေရှိရင် ကောင်းတဲ့အပြုအမူတွေပြုမူကြရင် အူမတွေ တောင့်လာကြမှာ မလွဲပါပဲ။

အရှင်သံဝရာလင်္ကာရ

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: