မေတ္တာပန်းခိုင် သုံးပွင့်ဆိုင်

* ပြသူ – သင်သူ – ချီးမြှောက်သူ ၊ စိတ်တူညီညွတ်ကြ။
* သံဃာနှင့် လူ ၊ အုပ်ချုပ်သူ၊ ကြည်ဖြူညီညွှတ်မှ။
* မေတ္တာပန်းခိုင် ၊ သုံးပွင့်ဆိုင် ၊ ပြန့်လှိုင်တိုးတက်ရ ။
* သာသနာရောင် ၊ ထွန်းလင်းပြောင် ၊ မြင့်ခေါင် စွမ်းပြည့်ဝ။
* မေတ္တာနှလုံး၊ အလှဆုံးကြောင့်၊ ရွှင်ပြုံးကြည်သာ တို့မြန်မာ ကမ္ဘာကပင် မော်ကြည့်ရ။

လောက၌ သာသနာပေါ်ပေါက်လာရန် ခက်ခဲသလောက် ဘုရားမရှိသည့်နောက် သာသနာ မကွယ်ပျောက်အောင် စောင့်ရှောက်ထိန်းသိမ်းရသည့် တာဝန်က လည်း ကြီးလေးလှသည်။ တစ်ဦးတစ်ယောက်ကောင်းအင်အားဖြင့် ထမ်းဆောင်နိုင်သော တာဝန်မျိုးမဟုတ်ပေ။ မည်သည့် ပစ္စည်းမျှ မပါဝင်သော စကော ၊ လင်ပန်း (ဗျတ်) စသော ပေါ့ပါးသော အရာမျိုးကို ဖိုခနောက် ၁လုံး ၊ ၂ လုံး ပေါ်တင်၍ လွယ်ကူသော်လည်း စားဖွယ်အပြည့် ထည့်ထားသည့် ဒယ်အိုးကြီးမျိုးကိုကား ခိုင်မာသော ဖိုခနောက်(ဖိုခုံလောက်) ၃ လုံးရှိမှ တင်၍ဖြစ်နိုင်သည်။ ဗုဒ္ဓသာသနာသည် အကြီးမားဆုံးသော အင်အားဖြစ်၍ အနှစ်သာရ ပြည့်ဝဆုံးလည်းဖြစ်သဖြင့် စိတ်ခွန်အား ကောင်းမွန်သန့်စင် ရိုးဖြောင့်သူ မေတ္တာရှင်တို့၏ မေတ္တာဖိုခနောက် (ဖိုခုံလောက်) ၃ လုံးပေါ်တင်မှ တာရှည်ခံမည်ဖြစ်သည်။ သာသနာ့တာဝန်ကို စိတ်ခွန်အားကောင်းသူများသာ နိုင်အောင် သယ်ပိုးထမ်းဆောင်နိုင်ကြသည်။

မြန်မာပြည်၌ လူဖြစ်ရသူများသည် အခြားနိုင်ငံများထက်ပို၍ သာသနာ့အကျိုးကို သယ်ပိုးထမ်းဆောင်ခွင့် ရကြသဖြင့် ပို၍ကံကောင်းသူများဖြစ်ကြသည်။ သာသနာ့ စွမ်းအားကို မှီခိုခွင့် ရကြသဖြင့်လည်း စိတ်ဓါတ်ပိုမိုရင့်ကျက်၍ ခံနိုင်ရည်စွမ်းအားများ ရရှိထားကြပြီး ကောင်းဆိုး၂ တန် လောကဓံကို စိန်ခေါ်ရဲလောက်အောင် စိတ်ဓာတ်ကြံ့ခိုင်သူများ ဖြစ်ခွင့်ရကြသည်။

သာသနာပြု လုပ်ငန်းဟူသည် (၁) မိမိကိုယ်တိုင် အသိတရား ကြွယ်ဝစေရန်နှင့် အကျင့်တရားပြည့်စုံရန် လေ့ကျင့်ပေးခြင်း ဟူသော ထိန်းသိမ်းရေး ၊ (၂) မိမိသိခွင့် ကျင့်ခွင့်ရသော တရားကို အခြားသော ပုဂ္ဂိုလ်များနှင့် နောင်လာနောက်သား သားစဉ်မြေးဆက် အဆက်မပြတ် သိနိုင်ကျင့်နိုင်အောင် ဟောပြောပို့ချ လမ်းညွှန်ပေးခြင်း ဟူသော ဖြန့်ဝေရေး၊        ဤကိစ္စတာဝန် (၂)ရပ်ကို ဆောင်ရွက်နေခြင်းပေတည်း။

သာသနာပြုလုပ်ငန်းသည် မေတ္တာပြဌာန်းသဖြင့် မေတ္တာပန်းခိုင် သုံးပွင့်ဆိုင် ပုံစံမျိုးဖြင့် ၀ိုင်းဝန်းစုပေါင်း ဆောင်ရွက်မှ အနှစ်သာရ ပြည့်ဝ၍ တာရှည်ခံမည်ဖြစ်သည်။ သာသနာပြု မေတ္တာပန်း ၃ ပွင့် ဟူသည် (၁) စာပေပို့ချသင်ပြပေးသူ ၊ တရားဟောပြောပြသူ ၊ (၂) စာပေနှင့် တရားသင်ယူနာကြားသူ ၊ (၃) မိဘပမာ သဒ္ဓါမေတ္တရှေ့ထား၍ ပစ္စည်းလေးပါ ချီးမြှောက်ထောက်ပံ့အားပေးသူတို့ပေတည်း။

ချီးမြှောက်သူတို့၏ မေတ္တာ၊ ချီးမြှောက်ခံရသူတို့၏ မေတ္တာစွမ်းအားများသည် အတွင်းတွင် ငြိမ်ဝပ်ပုန်းလျှိုးနေကြသည်မဟုတ်ဘဲ အရှိန်တက်ကာ လောကအတွင်း ထိုးဖောက်ပြန့်နှံ့လျှက် ဗဟိဒ္ဓကို ဓါတ်ခိုက်နေမြဲသာဖြစ်သည်။

အရှင်သိရိန္ဒာဘိဝံသ (ယော)

Advertisements